Link açıqlığı

Ukraina gençlerini, şu cumleden Qırımda da «rus dünyasından» qorçalamaq kerek – siyasetçi


Yevgeniya Gorünova

Ukraina devleti maqsat edinerek hususan, Rusiye tarafından işğal etilgen territoriyalarda gençlerni «rus dünyası» denilgen medeniy tesirden qorçalamaq kerek. Böyle bir fikirni Qırım.Aqiqar Radiosı efirinde V.İ.Vernadskiy adına Tavriya milliy universitetiniñ dontsenti, siyasetçi Yevgeniya Gorünova işğal altındaki yarımadada keçirilgen «Tavrida» gençler forumını Vladimir Putinniñ ziyaret etkeninen bağlı izaatında.

«Men işğalden evel Qırımğa, çeşit türlü fondlardan kelgen arqadaşlar Rusiye-Ukraina işbirligi, medeniy alâqalar ve saire meseleler aqqında ikâye eterek, paralel olaraq iç bir vaqıt Ukraina devletiniñ olmağanınen bağlı fikirlerni tatbiq etkenlerini hatırlayım. O zamanlarda buña kimse qulaq asmay edi, lâkin bügün de-bügün ise, devlet qurulışları buña beñzer areketlerni eñ başında kesip, rusiyeli medeniy-tarihiy ekspansiyanıñ siyasiy şekilge çevirilmesine yol bermemeliler», – dep saya siyasetçi.

2017 senesi Qırımda rusiyeli akimiyet ötkergen «Tavrida» gençler forumında iştirak etmek içün 13 biñ dane ariza yollanğan. Beklenilgenine köre, neticelevden soñ 100 teşebbüsçi grant destagi alacaq. Rusiye prezidenti Vladimir Putin avgustnıñ 20-nde işğal altındaki Qırımğa iş ziyaretinen kelgen vaqtında «Tavrida»nı da ziyaret etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG