Rusiye avtoritar ve totalitar devlet olaraq devam etken taqdirde, qırımtatarları sovetlerniñ «işbirlikçi» ve«halq duşmanı» degen efsanesinden ileride de qurtılıp olamaz. Böyle bir fikirni Qırım.Aqiqat Radiosı efirinde qırımlı tarihçı Gülnara Bekirova beyan etti.
«Bügünki künde Rusiye büyük isteknen sovetlerniñ qırımtatarlarınıñ «duşmanlığı» aqqındaki efsanesine qol tutmaqta. Totalitar devlet şartlarına köre, hususan istilâ etilgen Qırımda bir düşmannıñ bulunması şart. Rusiye akimiyeti bütün samimiyetinen qırımtatarlarınıñ bügünki areket tarzı, narazılıqları ve sairesine şaşa. Onıñ içün, eger ileride Rusiyede totalitar rejim saqlanıp qalacaq olsa, efsaneleştirme de devam eter», – dep qayd etti tarihçı.
SSCB Devlet mudafaa komitetiniñ qararına binaen 18-20 mayıs 1944 senesi NKVD-NKGBniñ hususiy operatsiyası esnasında Qırımdan Orta Asiya, Sibiriya ve Uralğa, resmiy malümatqa köre 194 111 insan olaraq, qırımtatarlarınıñ episi sürgün etilgen edi. Bunıñ aqlı bir areket olğanınıñ kösterilmesi içün Qırım almanlar tarafından işğal etilgeninde güya qırımtatarları işbirlik yapqanlar denilgen edi.
