Link açıqlığı

Seitablayevniñ «Başqasınıñ duası» filmi Ukrainanı «Oskar»da temsil etüv aqqı içün küreşecek


Ukrain rejissörı Ahtem Seitablayevniñ «Başqasınıñ duası» filmi Ukraina adına «Oskar» kinomükâfatı içün yapılğan milliy nominant saylâmasında «Çetel tilinde çıqqan eñ yahşı film» nominatsiyasında iştirak etecek.

«Kerçekten de, menim filmim milliy saylamada iştirak etecek. Lâkin mında şimdilik fevqulâde bir şey yoq. Saylâmada bu yıl çıqqan filmlerniñ epsi iştirak etecek. Elbette, anda qoyulğan hususiy bir şartlar da mevcut olsa bile, fevqulâde bir şey körmeyim», – dep ayttı Seitablayev Qırım.Aqiqatqa bergen izaatında.

«Ukrain oskar komiteti» Facebookta bildirgenine köre, «Oskar» kinomükâfatında Ukrainanı kim temsil etecegine dair soñki qarar avgustnıñ 29-nda berilecek.

Ahtem Seitablayev - ukrain ve qırımtatar oyuncısı, teatr ve kino rejissörı, stsenarist, Qırım Mutar Cumhuriyetinde nam qazanğan oyuncısı.

O, 1944 senesi qırımtatar sürgünligi aqqındaki «Haytarma» filminiñ rejissörı ola. Mayısnıñ 18-de onıñ «Başqasınıñ duası» filmi taqdim etildi. Yañı levhası Ekinci cian cenki vaqtında 88 yeudiy balasını ölümden qurtarğan qırımtatarı Saide Arifovağa bağışlana. «Kiborgi» filmi Ukraina şarqındaki cenk vaqtında Donetsk ava limanı uruşlarını tarif etecektir.

XS
SM
MD
LG