QMC prokuraturası Kreml nezaretindeki Qırımnıñ sabıq prokurorı Natalya Poklonskayanen bağlı eki dane cinaiy davanı taqiqi ete: biri devlet hainligi, digeri de qırımtatar Meclisiniñ faaliyeti yasqlanması boyunca. Bu aqta avgustnıñ 22-nde Kyivde ötkerilgen matbuat konferentsiyasında QMC prokurorı Gündüz Mamedov ikâye etti.
«Poklonskayanen bağlı cinaiy işni Ukraina Baş prokuraturası yürsetmekte, lâkin bizim de onen bağlı bir qaç epizodımız mevcut. Biz alâ daa qabaatlav boyunca bir qarar beralmağanımız içün, materiallarnı birleştirmek maqsadınen Baş prokuraturağa yollaymız», – dep bildire UNİAN QMC prokuraturasınıñ sözlerini.
Mamedov ileride eki dane cinaiy işniñ birleşme ihtimali olğanını da ayta.
2017 senesi aprelniñ 5-nde Ukraina prokuraturası Kyivniñ Peçersk rayon mahkemesine muracaat eterek, qırımlı memurlar ve havfsızlıq küçleri, şu cumleden Qırımnıñ sabuq prokurorı Natalya Poklonskayanıñ bağlı mahkemeden evel hususiy taqiqat keçirilmesi boyunca ruhset istegen edi. Prokuratura qayd etkenine köre, çağıruvğa kelmegeni em de Qırımnen poçta bağı olmaması sebebinden, daa evel haber etilgen qabaatlavlar deñişkeni ve yañı soyu azırlanğanınen bağlı yazılı bildirüvler tizilgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
