Link açıqlığı

QMC prokuraturası «Umerov davası» boyunca Qırım mahkemecilerinen prokurorına nisbeten qabaatlav proyekti azırladı


QMC prokuraturası qırımtatar milliy areketiniñ liderlerinden biri olğan İlmi Umerovnıñ davasında iştirak etken Kreml nezareti altındaki Qırım mahkemecilerinen prokurorına qabaatlavnı beyan etmek niyetinde. Bu aqta avgustnıñ 22-nde keçken matbuat konferentsiyasında QMC prokuraturası bölüginiñ yolbaşçısı Aleksandr Darakçi ikâye etti.

«Bu davada iştirak etken prokurorğa nisbeten qabaatlav proyekti azırlandı. Ondan da ğayrı, bu dava bütünley uydurılğanına dair isbatlar toplanmaqta. Yaqın zamanda bizler qabaatnı yalıñız davağa qoltutqan prokurorğa nisbeten degil de, mahkemeciler qabaatlanğanı aqqında da söz yürsetebilecekmiz», – dep qayd etti QMC prokuraturasınıñ temsilcisi.

2017 senesi iyünniñ 7-nde Kreml nezaretinde bulunğan işğal altındaki Qırımnıñ Aqmescit rayon mahkemesi İlmi Umerovnıñ davası üzerinde çalışıp başladı. Mahkeme oturışları aftanıñ er çarşenbe künü ötkerilecegi aqqında aytılğan edi.

2016 senesi FSB taqiqatçıları İlmi Umerovqa qarşı ekstremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG