Rusiyeli siyasetşınas Födor Kraşeninnikov, Vladimir Putinniñ Rusiye tarafından işğal etilgen Qırımnı ziyaret etmesi, yarımadanıñ ealisi Çeçenistan misali prezident saylâvları içün saylâv resursı olaraq azırlana dep saya. Böyle bir fikirni ekspert Qırım.Aqiqat Radiosı efirinde beyan etti.
«Vladimir Putin içün Tıva, Sankt-Peterburg, Soçı – Qırım da olardan biri olmaq üzre, bir qaç aziz olğan region bar. Anda onıñ aytqan sözleriniñ epsi, bütün Rusiyege degil de, yalıñız o regionlarğa aytılğan sözlerdir. «Rusiyeniñ Mekkesi» aqqındaki laflar Aqyar sakinlerine aytılğanında şube yoq. Vladimir Putin Qırımnı, Çeçenistan misali yüksek faizde rey berecek eali, onıñ özek saylâvcıları yaşağan saylâv resursı olaraq azırlay», – dep qayd etti siyasetçi.
Rusiye prezidenti Vladimir Putin ve baş nazir Dmitriy Medvedev avgustnıñ 18-nde işğal altındaki Qırımğa kelip çıqtı. Olar «Buhta Kazaçya» tasil merkezini, «Hersones Tavriçeskşiy» qoruq-muzeyini ve «Hersones operası» muzıkalı festivalini ziyaret ettiler. Vladimir Putin Rusiye tarafından tayinlengen Aqyar gubernatorı Dmitriy Ovsyannikovnen körüşti. Avgustnıñ 20-nde Putin Qırımnıñ Streguşeye qasabasında ötkerilgen «Tavrida» tasil forumunı ziyaret etti.
Ukraina Tışqı işleri nazirligi Rusiye prezidenti Vladimir Putin işğal etilgen Qırımnı ziyaret etkeni sebebinden Rusiye tış siyaset şubesine narazılıq mektübi yolladı.
