Qırımtatar faalleri 1987 senesi yazda Moskvadaki vaqialarğa bağışlanğan hatıra tedbirini Aq Qayada keçirip olamadı. Rusiye uquq qoruyıcıları raatlıq alanını blok etti. Tedbir iştirakçileri Qarasuvbazar camisine keçmege mecbur oldı.
Mında dua oqup, Moskva vaqialarınıñ iştirakçilerini diñlediler, dep tarif etti qırımtatar milliy areketiniñ faali Zair Smedlâyev Qırım.Aqiqatqa.
«Pilâv aşağan soñ faallerniñ bir qısmı Eski Qırımğa ketti, anda Server Karametovnıñ azatlıqqa çıqmasınen bağlı dua merasimi keçirile», – dep ayttı o.
Avgustnıñ 20-de Qarasuvbazar rayonınıñ Aq Qaya köyünde tintüv başlağanı belli oldı. Rusiye uquq qoruyıcıları «Kovboy» raatlıq alanında «silâ anbarı» bar dep onı sarıp aldı.
Kelgen insanlarnı tedbir keçirilecek yerge almadılar. Rusiye uquq qoruyıcıları toplaşqan insanlarnıñ areketleri Rusiye Memuriy kodeksiniñ «qanunsız miting» maddesi olaraq tanıla, dep haber etti.
Qırımdaki Rusiye hızmetleri vaziyetni izaatlamay.
Rusiye Qırımnı işğal etken soñ yarımadada mustaqil jurnalistler, cemaat failleri oturğan evlerinde tintüvler keçirilmege başladı. Uquq qorçalayıcılar bunı «farqlı fikirlerge qarşı küreş» dep adlandıra.
