Link açıqlığı

Qırımdaki mahkeme «fevral 26 davasını» prokuror azır olmağanından başqa künge avuştırdı – advokat


Kremlniñ nezareti altındaki Aqmescitniñ Merkeziy rayon mahkemesi «fevral 26 davasını» avgustnıñ 24-ne avuştırdı. Qabaat tarafı oturışqa azırlanamağan eken, dep bildirdi Qırım advokatı Edem Semedlâyev avgustnıñ 18-de Qırım.Aqiqatqa.

«Mahkeme avgustnıñ 24-ne avuştırıldı, prokuror qabaat qararını tasdıqlamağan», – dedi Semedlâyev.

Aynı sebepten mahkeme oturışnı bir aftağa endi qaldırğan edi.

Avgustnıñ 1-de Kreml kontrol etken işğal etilgen Qırımnıñ Yuqarı mahkemesi «fevral 26 davasınıñ» eki mabüsi Ali Asanov ve Mustafa Degermenciniñ ev apislerini oktâbrniñ 7-ne qadar uzatmaq qararından advokatlarnıñ şikâyet arizalarını red etti.

Kreml kontrol etken Aqmescit Merkeziy rayon mahkemesi iyülniñ 20-de «fevral 26 davasınıñ» mabüsleri Ali Asanov ve Mustafa Degermenciniñ ev apsinde bulunma müddetini oktâbrniñ 7-ne qadar uzattı.

«Fevral 26 davasınıñ» mabüsleri Mustafa Degermenci ve Ali Asanov aprelniñ 6-dan berli ev apsinde bulunalar. Bundan evel ise Aqmescit SİZOsında yatqan ediler.

2015 senesi yarımadada qırımtatar faallerini 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni içün mahküm etmege başladılar. Olarnı qalabalıqlarda iştirak etkeninde qabaatlaylar.

Soñra mahkeme «fevral 26 davasını» ekige böldi: Qırımtatar Milliy Meclisiniñ reis muavini sıfatındaki Ahtem Çiygozniñ davası olaraq ve ayrıca esnasnıñ diger iştirakçileri olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev davası şeklinde.

XS
SM
MD
LG