Ukrain ve qırımtatar oyuncısı, teatr ve kino rejisseri Ahtem Seitablayev işğal etilgen Qırımda Rusiye uquq qoruyıcıları keçirgen tintüv ve tutuvlardan accı çekkenini tarif etti. Bunı Seitablayev Qırım.Aqiqatqa avgustnıñ 8-de bildirdi.
«Bir şey yapıp olamağanımdan accı çekken bir adamım. Telükesiz bir yerde olğanımdan bir taraftan utanam, anda ise yaqın insanlarıñ, semetdeşleriñ, tanımağan insanlarıñ bile olsa, maneviy ceetten yaqın olğanlarnıñ evlerine saba saat 4-te kireler», – dedi o.
Ahtem Seitablayevniñ qayd etkenine köre, Qırımda Rusiye uquq qoruyıcıları yerli ealini qorquzacaq ola.
«Bunı yapqanlarğa yahşı bir şey aytamam. Qırım kene Ukrainanıñ olacağına, Ukraina terkibinde Qırım Qırımtatar milliy territorial muhtariyeti olacağına inanam. Devletke hainlik yapqan, qolları qanda olğanlar mıtlaqa cevap berecek», – dedi o.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
