Qırımtatar milliy areketiniñ liderlerinden biri olğan Nariman Celâl Boris Babinniñ Ukraina prezidentiniñ Qırımdaki daimiy temsilcisi olaraq tayinlengenine qol tuttı. Bu aqta o Qırım.Aqiqatqa bergen izaatında söz yürsetti.
«Boris Babin belli halqara uquqçıdır. O insan, bir ekspert sıfatında, özüni tecribeli birisi olaraq kösterdi. Biz onıñ telekanaldaki çıqışlarını pek yahşı hatırlaymız. O, uzaqtan olsa da, mahkemede iştirak etkenimizde qırımtatar halq Meclisine yardım etken edi. O, Qırım ve qırımtatar meselesini yaqından bile», – dep saya Celâl.
Onıñ sözlerine binaen, Boris Babinniñ faaliyetine temsilcilik yolbaşçısınıñ «bulançıq» vekâletligi ve esas Ukrainadaki siyasiy vaziyet keder etebile.
«Problema şundan ibarettir ki, prezident temsilciliginiñ vekâletligi daa evel ve al-azırda ğayet bulançıqtır. Ayrıca bizler, Ukrainada Qırımnıñ kelecegine er türlü köznen baqqan siyasiy küçler olğanını bilemiz. Bir ihtimal «buña ayaq çalğanlar da» çıqar, – dep ilâve etti Celâl.
Avgustnıñ 17-nde Ukraina prezidenti Petro Poroşenko Qırım Muhtar Cumhuriyetindeki daimiy temsilcisi olaraq halqara uquqçı Boris Babinniñ tayinlenmesine dair buyruq imzaladı. Poroşenko Qırım Muhtar Cumhuriyetindeki daimiy temsilcisiniñ yardımcısı vazifesine İzet Gdanovnı tayin etti.
2017 senesi iyülniñ 10-dan başlap Hersonda Ukraina prezidentiniñ Qırım Muhtar Cumhuriyetindeki daimiy temsilciligi yerleşken binanıñ yanında Natalya Popoviçni istifağa yollaması talabınen narazılıq aktsiyası keçken edi. Avgustnıñ 18-nde teşebbüsçi gruppa şartlar yerine ketirilgeni sebebinden öz piketini yekünlecegini bildirdi.
