Link açıqlığı

Qırımnıñ üç rayonındaki içilgen tatlı suv tuzlanıp başladı– yarımadanıñ ziraat nazirligi


Yeraltı suvları faal qullanılğanı sebebinden Qırımnıñ üç rayonında içilgen tatlı suv tuzlanıp başladı.Bu aqta avgustnıñ 18-nde Kreml nezareti aktındaki Qırım ziraat naziri Andrey Rümşın bildirdi.

Onıñ sözlerine köre, suvnıñ tuzlanğanı Qırımnıñ Aqşeyh, Yañı Qapu, Canköy rayonlarında körülmekte: dep bildire RİA «Krım».

«İçilgen tatlı suv probleması Aqşeyh, Yañı Qapu, Canköy rayonlarında mevcut. İşletilgen suv yerini, Sivaştan kelgen suvlar toldurğanı sebebinden, küçlü bir tuzlanma ola», – dey Rümşin.

Qırımlı nazir aytqanına köre, bu rayonlarda tatlı suv çıqarğan donatmalar qoyulabile. Amma bu arada Rümşin bu rayonlardaki içilgen tatlı suv probleması çezilecek muddet aqqında kesen-kes bir şey aytalmadı.

Rusiye Qırımnı istilâ etken soñ, yarımadanı Dnepr özeninen bağlağan ekâne suv yolağı olğan Şimaliy-Qırım kanalından suv berilmesi kesilgen edi.

Dneprden kelgen suv kesilmesi neticesinde suvarıluv vastasınen asralğan Qırım ziraatçılığı çoq zarar körgen edi. Qırımnıñ suvarılğan 140 biñ gektar toprağından yerli suv imkânlar qullanaraq suvarılğan yalıñız 17 biñ gektar topraq qaldı. Artıq pirniç asralmay. Bir yıldan soñ suvarılğan topraq alanı 13,4 biñ gektarğace tüşti.

XS
SM
MD
LG