Link açıqlığı

Qırımda askerlik yapqan asker özüni asqan – Rosgvardiya


Qırımda Rosgvardiya askeri ayatınen vedalaşqan aqqında haber etilmekte. Onı Kefe etrafındaki ormanda tapqanlar. Özüni asqan asker aqqındaki haberni Rusiye milliy gvardiyası Şimaliy-Kavkaz okrugı matbuat hızmeti avgustnıñ 18 Cuma künü tasdıqladı.

Haber etilgenine köre, asker Kefe etrafındaki askeriy birlikte hızmet ete eken ve onıñ ğayıp olğanı aqqında avgustnıñ 11-nde saba belli olğan.

Avgıustnıñ 16-nda ormanda özüni asqanını isbat etken izler olğan askerniñ cesedi tapılğan maalde, yanında intihar tezkeresi de bar eken, dep bildire Rusiye arbiy memuriyetiniñ matbuat hızmeti.

«Alınğan ilk malümatqa köre, ölüm askerniñ hızmetinen alâqalı degil eken. Vaqia aqqında regional arbiy-taqiqat organlarına haber etilgen. Vaqia sebepleri taqiq etilmekte», – denilmekte press-relizde.

Rosgvardiyanıñ malümatına köre, okrug komandanınıñ yardımcısı general-mayor Vitaliy Sadovnikov yolbaşçılığı altındaki komissiya memuriy taqiqat işleri alıp barmaqta.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG