İşğal altındaki Qırımnıñ aliy oquv yurtları yerine yerli mezunlar Ukraina ve Avropa universitetlerine oqumağa kireler. Böyel bir malümatnı Qırım.Aqiqat Radiosı efirinde «Almenda» vatanlaşlıq tasil Merkeziniñ işğal etilgen territoriyalardakilerniñ tasil meseleleri boyunca eksperti Valentina Potapova bildirdi.
«11-nci sınıf mezunlarınıñ sayısı azaldı, çünki ana-babalarnıñ çoqusı Rusiyeden ğayrı iç bir yerde tanılmağan aliy oquv yurtlarınıñ diplomı alınğanını istememekte. 2014 senesi Qırım mekteplerini 15 biñ talebe bitirdi, 2017 ise – 10 biñden de az. Biz alğan malümatqa köre, iç olmağanda olarnıñ 1 biñi esas Ukrainağa oquvğa kirmege ketti, o qadarı ya da ziyadesi – Rusiyege, ondan da ğayrı – sanktsiyalarğa baqmadan Poloniya, Çehiya, Almaniya kibi Avropa aliy oquv yurtlarına kettiler», – dep qayd ete ekspert.
Aynı zamanda Vernadskiy adına Tavriya milliy universitetiniñ rektorı Vladimir Kazarin Qırımdan Kyivge kelgen abituriyent sayısı pek artqanını bildirmekte.
«Meselâ TMUğa, diger aliy oquv yurtlarına nibseten kirgen qırımlı abituriyent sayısı epsinden yüksek. Olarnıñ arasında hususan esas Ukraina mekteplerinden mezun olğanlarnıñ sayısı daa da ziyade edi. Universitetimizge bağlı kolejge de bayağı bir qırımlı oqumağa kirdi. Yaqında bizge Qırım federal universiteti denilgen yerden oquvını devam etmek maqsadınen yarım gruppa bizge avuştı», – dep ikâye etti rektor.
Avgust ayında Qırım federal unüversitet ve Aqyar devlet universiteti meşur zenaatlarğa büjet esabına oqumağa kirgen talebe sayısı azalğanı aqqında ilân etti.
Ukraina tasil ve ilim naziri Liliya Grineviç iyünniñ 28-ne köre bergen malümatına binaen,işğal altındaki Qırımdan kelip esas Ukrainadaki aliy oquv yurtlarına kirmek içün 200 abitıriyent ariza yazğan.
