Kremlniñ nezareti altındaki Aqmescitniñ Jeleznodorojnıy rayon mahkemesiniñ qararı ile apiske alınğan esli-başlı qırımtatar faali Server Karametov sağlığı yaramağanından şikâyet ete. Bunı onı nezaret izolâtorında ziyaret etken advokat Edem Semedlâyev avgustnıñ 17-de bildirdi.
Advokatnıñ aytqanına köre, esli-başlı faalniñ alı fena.
«Yaramay yuqlağanını ayta, bugün iç yuqlamadı. Onı raatsızlağan bir şey bar. Yatqan kamerada gece ışıq yana. Bu sebepten yuqlap olamaydır ya da sağlığı fenalaşqanından», – dep tarif etti video muracaatında Semedlâyev.
Advokatnıñ bildirgenine köre, Server Karametov uquq qoruyıcılarnıñ qaba yanaşqanını ve kezintige yalıñız bir saat ayırğanını şikâyet ete.
Server Karametov avgustnıñ 19-da aqşam saat 21:47-de azatlıqqa çıqmalı. Advokat, istegi olğan er kesni esli-başlı faalni kelip qarşılamağa çağırdı.
Avgustnıñ 8-de Aqmescitte Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşında Karametov Parkinson hastalığına tutulğan insandır.
Avgustnıñ 9-da Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovğa 10 kün memuriy ceza tayin etken edi. Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.
Amnesty International halqara uquq qorçalayıcı teşkilâtı Rusiye akimiyetinden Server Karametovnı acele azat etmesini talap etti.
