Kyivde Ukraina Mustaqillik künü qayd etilgende «Qırım evi» müessisesi bir sıra tedbir ötkerecek. Bunı Ukraina medeniyet naziri Yevgeniy Nişçuk avgustnıñ 17-de Kyivdeki brifingde bildirdi.
«Kyiv sakinleri ve musafirleri, semetdeşlerimiz çıqıp, qırımtatar halqı, Ukraina medeniyetiniñ zenginligini körsin dep, ayrı meydançıq ayırılacaq, oyun, ses, muzıka taqdim etilecek. Podol «Qırım evi yüreklerni birleştire» aktsiyasınen parlaq olacağına quvanam», – dep ayttı Nişçuk.
Ukraina medeniyet naziriniñ qayd etkenine köre, Ukraina mustaqilliginiñ 26-ncı yıllığı «oğrağan vaziyetimizniñ ağrısı ile qayd etile, lâkin epimiz beraber buña dayanıp birlik olacaqmız».
Yevgeniy Nişçuk qırımlılarnı Qırımnıñ işğalden azat etilecegine işanmağa çağırdı.
Teşkilâtçılarnıñ aytqanına köre, Ukraina mustaqilligi kününe bağışlanğan tedbirlerde Qırım sanatkârları Zlata Ogneviç, Elzara Batalova, Aziza İbragimova, bestekâr Üsein Bekirov, «Şatur-Gudur» taqımı iştirak etecekler. Bunıñnen beraber, ustalarnıñ dersleri ve dekarativ-ameliy sanatnıñ yarmalıqları olacaqtır.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
