Link açıqlığı

Rusiye tilşınasları «Umerov davasınıñ» FSB keçirgen ekspertiza neticelerinen razı olmadı – Ayşe Umerova


Kreml nezareti altındaki Aqmescit rayon mahkemesiniñ qırımtatar milliy areketi liderlerinden biri İlmi Umerovnıñ davası boyunca oturışında Rusiyeniñ «Gildiya lingvistov» azırlagan taqrizi cinaiy iş malümatlarına ilâve etildi.

Bu taqrizniñ ilâve etilmesini avgustnıñ 16-da mahkemede Umerovnıñ advokatı Mark Feygin istedi, dep bildirdi qabaatlanğannıñ qızı Ayşe Umerova Facebookta.

Onıñ aytqanına köre, ekspert qararınıñ taqrizi Moskvada «Gildiya lingvistov – ekspertov po dokumentatsionnım i informatsionnım sporam» (GLEDİS) mütehassısları tarafından azırlanılğan.

«Taqriz müellifleri – filologiya ilimleri doktorları ve namzetleri. Mark (Feygin – QA) muracaat berip, taqrizniñ esas qaydlarını seslendirdi, anda ekspertizanıñ bir çoq hatası, ıstılalar deñiştirilgeni qayd etile, ekspertizanı taqiqatçı İgor Skripkanıñ sımarışı ile FSB hadimi İvanova Olga yapqan», – dedi Ayşe Umerova.

Ayşe Umerovanıñ aytqanına köre, prokuror taqrizni baqıp «qarşı çıqtı». Onıñ bildirgenine köre, «dava malümatlarına ancaq esnas tarafları qıymet kese bile, taqriz müellifleri mesüliet aqqında tenbiyelenmegen».

Qadı Andrey Külişov taqrizni cinaiy iş malümatlarını qoşmağa qarar aldı. Ayşe Umerovanıñ fikirince, taqriz «ekspertiza boş olğanını isbatlap, taqiqat ekspertizasını tamamen yoq ete».

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.


XS
SM
MD
LG