Link açıqlığı

«Umerov davasınıñ» mahkemesinde terciman tapılmadı, qırımtatarca aytacaq şaatlarnıñ sorğusı başqa künge avuştırıldı


Kreml nezareti altındaki Aqmescitniñ rayon mahkemesinde qırımtatar milliy areketi liderlerinden biri İlmi Umerovnıñ davası boyunca oturışta imaye şaatlarınıñ sorğusı aynıñ soñuna qadar qaldırıldı. Qırımtatarca bilgen terciman tapılmağanı içün oturışlar cedveline deñişmeler kirsetildi.

Qabaatlanğannıñ qızı Ayşe Umerovanıñ aytqanına köre, qadı, «Lingvist» tercimeler bürosında böyle mütehassıslar yoq, Qırım müendislik-pedagogika universitetiniñ tercimanları avgustnıñ 28-ne qadar tatilde dep, mahkeme terciman tapıp olamağanını bildirdi.

İmaye terciman kerek olmağan şaatlarnı sorğuğa çekmege teklif etti. Lâkin şaatlar ana tilinde şaatlıq etme anayasa aqqı yerine ketirilmesini talap eteler.

Çarşenbe künü, avgustnıñ 16-da, mahkemede imaye şaatlarınıñ sorğusı olacaq edi. Olar qırımtatarca şaatlıq etmege istedi.

İyünniñ 7-de işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.



XS
SM
MD
LG