Qırım insan aqları bağ gruppasınıñ koordinatorı Abdureşit Cepparovnıñ fikirince, Rusiye Federal havfsızlıq hızmeti narazılıqlar dalğası olacağından qorqa. Bu sebepten Server Karametovğa qoltutmaq içün yalıñız başına piket keçirgen bir qaç esli-başlı qırımlı apiske alınmadı.
«Daa beş insan Server ağağa qoltuttı. Bu beş kişi ne içün apiske alınmadı degen sual peyda ola. Cevabı belli: olar da apiske alınsa edi, yañı insanlar narazılıq bildirir edi, daa çoq insan çıqar edi, biri-biri artından, soñra ise büyük areket peyda olur edi. FSB ile aqıl tanışıp, birisine para cezasını bermek yeter, dep tüşüngendirler», – dep qayd etti Cepparov avgustnıñ 15-de Qırım.Aqiqatqa.
Cepparov, mezkür adise yarımadada ve onıñ tışında büyük rezonans çıqardı, dep qoştı.
«Server ağa epimizniñ tüşüngenini ayttı – balalarımız terrorist degil. Onı kimse piketke çıqmağa zorlamadı. Onıñ şahsiy qararı edi. O vaqıt mahkeme binası ögünde edim. O, yanımızğa kelip selâmlaştı, biraz laf etti, soñra ise kimse beklemegen şeyni yaptı... Qırım ve onıñ tışında rezonans oldı. Onı otuz yıldan berli tanıyım. O, er vaqıt faal edi, narazılıq bildirmek bu onıñ şahsiy teşebbüsidir», – dep tarif etti Abdureşit Cepparov.
Uquq qorçalayıcı, içtimaiy ağlarda belli bir siyasiy küçler Karametovnı piket keçirmege zorladı kibi laflar kerçek olmağanını qoştı. Cepparovnıñ bildirgenine köre, esli-başlı qırımlı bir de bir siyasiy firqağa kirmey ve piket aqqında kimseni tenbiyelegeni yoq.
Amnesty International halqara uquq qorçalayıcı teşkilâtı Rusiye akimiyetinden Server Karametovnı acele azat etmesini talap etti.
Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.
Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.
Avgustnıñ 8-nde Aqmescitte Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşındaki Karametov Parkinson hastalığına tutulğan insandır.
Server Karametov işğal etilgen Qırımda bundan evel de tutılğan edi. Böylece, mayısnıñ 18-nde, qırımtatar halqı genotsidiniñ hatırası kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqanından soñ tutılıp alınğan edi. Üç saat tutılıp, oña qarşı memuriy protokol tizilgen soñ, o yiberilgen edi.
