Ukrainanıñ kino meseleleri devlet agentligi avgustnıñ 15-de Qırım rejissöri Ahtem Seitablayevniñ «Kiborgi» filminiñ resmiy treylerini taqdim etti.
Levha 2017 senesi dekabrniñ 6-da kinoteatrlerde kösterilecek.
«Kiborgi» filmi – cenk ikâyesi degil de, yañı Ukrainanı qurğan zemaneviy qaramanlar aqqında bir levha. Olar pek farqlı, lâkin tuvğan toprağını istilâcıdan qorumaq maqsadları bir.
«Filmde qaramanlarımıznıñ irade küçüni, serbest ve bahtlı bir memleket qurmaq içün bu cenkke dayanmaq istekleri ne qadar müim olğanını köstermege tırıştıq», – dep qayd etti Ahtem Seitablayev.
Ahtem Seitablayev – ukrain ve qırımtatar kino oyuncısı, teatr ve kino rejissöri, Qırım Muhtar Cumhuriyetinde nam qazanğan oyuncı.
O, 1944 senesi qırımtatar sürgünligi aqqında «Haytarma» filminiñ rejissöri ola. Mayısnıñ 18-de onıñ «Başqasınıñ duası» filmi taqdim etildi. Yañı levhası Ekinci cian cenki vaqtında 88 yeudiy balasını ölümden qurtarğan qırımtatarı Saide Arifovağa bağışlandı. «Kiborgi» filmi Ukraina şarqındaki cenk vaqtında Donetsk ava limanı uruşlarını tarif etecektir.
