Link açıqlığı

Ukraina havfsızlıq hızmeti Qırımda tutulğan Gennadiy Limeşko ile alâqaları olğanını inkâr ete


Ukraina havfsızlıq hızmeti işğal etilgen Qırımda tutulğan Gennadiy Limeşkonıñ hızmet ile bağlı olğanını inkâr ete. Bunı avgustnıñ 15-de SBU matbuat kâtibi Yelena Gitlânskaya Qırım.Aqiqatqa bildirdi.

«Gennadiy Limeşko Ukraina havfsızlıq hızmetiniñ hadimi degil», – dep ayttı Gitlânskaya.

Ukraina havfsızlıq hızmetiniñ resmiy saytı izaatını derc etip, Limeşkonıñ tutulmasını «daa bir provokatsiya» dep adlandırdı.

Rusiye Federal havfsızlıq hızmeti, avgustnıñ 12-de işğal etilgen Qırımda Sudaq – Novıy Svet elektrik ağını bozacaq olğan Ukraina vatandaşı yaqalanğanını bildire. «SBU agenti» yarımadağa diversiya kerçekleştirmesi içün yollanılğan eken.

Ukraina Mudafaa nazirligi, işğal etilgen Qırımda tutulğan ve Rusiye FSB idaresi tarafından «SBU agenti» dep adlandırılğan Ukraina vatandaşı Gennadiy Limeşko Ukraina Silâlı quvetlerinde añlaşma esasında askerlik yapıp, aqımdaki seneniñ mayıs ayında vazifege uyğun olmağanı içün işten boşatılğan edi, dep bildirdi.

Rusiye mahsus hızmetleri er kişiniñ yaqalanması ve sorğusı videosını aydınlattı. O, 1992 senesi doğma Gennadiy Limeşko olğanını aytıp, işğal etilgen Qırımda diversiya azırlağanını bildirdi.

Avgustnıñ 14-de Kreml nezareti altındaki Aqmescitniñ Kiyev rayon mahkemesi Gennadiy Limeşkonı eki ayğa, oktâbrniñ 13-ne qadar apiske aldı.

Rusiye bundan evel de Qırımda «ukrain diversantları» yaqalanğanını bildirgen edi. Ukraina mahsus hızmetleri bunı red ete.

Qırım.Aqiqat Qırımda tutulğan Gennadiy Limeşko aqqında malümat toplay.

XS
SM
MD
LG