Kreml nezareti altındaki Aqmescitniñ Kiyev rayon mahkemesi Ukraina vatandaşı Gennadiy Limeşkonı eki ayğa apiske aldı. Rusiye Federal havfsızlığı onıñ tutulğanını haber etken edi. Rusiye mahsus hızmetleri er kişini «Ukraina havfsızlıq hızmetiniñ agenti» dep adlandırıp, işğal etilgen Qırımda diversiya azırlağanında şekley.
Qarar avgustnıñ 14-de açıq mahkeme oturışında qabul etildi, dep bildire Rusiye kütleviy haber vastaları mahkemeniñ matbuat hızmetine esaslanıp.
«Aqmescitniñ Kiyev rayon mahkemesi, Qırım Cumhuriyetindeki FSB idaresiniñ taqiqat bölüginiñ taqiqatçısı Limeşko Gennadiy Gennadyeviçni eki ayğa, 2017 senesi oktâbrniñ 13-ne qadar, apiske almaq muracaatını qanaatlendirdi», – dep qayd etildi mahkemede.
Avgustnıñ 15-de FSB işğal etilgen Qırımda Herson vilâyetindeki «SBU agenti olğan» Ukraina vatandaşı yaqalanğanını bildirdi. O, Qırımğa «diversion tedbirlerni kerçekleştirmek içün» yollanılğan eken.
Ukraina Baş ştabı haberni teşkere, dep bildirdi Qırım.Aqiqatqa.
Ukraina havfsızlıq hızmetiniñ Qırım.Aqiqatqa bildirgenine köre, bunıñnen bağlı resmiy beyanat azırlanıla ve eñ yaqın vaqıtta derc etilecek.
Rusiye bundan evel de Qırımda «ukrain diversantları» yaqalanğanını bildirgen edi. Ukraina mahsus hızmetleri bunı red ete.
