Link açıqlığı

Saatnıñ esas haberi

Aqmescitte Karametovge qoltutmaq içün eñ az beş esli-başlı insan yalıñız başına keçirilgen piketke çıqqanı aqqında haber etile


Server Karametov
Server Karametov

Aqmescitte daa evel tutulıpp alınğan qırımtatar faali Server Karametovke avgustnıñ 14-nde saba yalıñız başına piket keçirmek maqsadınen çıqqan eñ az dört kişi tutulıp alındı. Bu aqta Facebook saifrsine qırımlı advokat Edem Semedlâyev haber etmekte.

O, bergen malümatqa köre, Rusiye silâlı hızmetiniñ vekilleri Yaruqul Davlatov, Aleksandr Dyaçkov, Seytumer Seytumerov ve Selim Teyfuqovnı tutıp alğan. Olarnı polisniñ Jeleznodorojnıy rayon bölügşne alıp ketkenler. Episini sorğuğa çekip fotoresimge çıqarmağa isteyler.

Edem Semedlâyev Aqmescitte insanlar tutulğanını izaatladı (video)
Bekleñiz, lütfen

No media source currently available

0:00 0:01:09 0:00

Tutılğanlarnıñ yanında advokar Edem Semedlâyev bulunmaqta dep haber ete Qırım.Aqiqatqa onıñ zenaatdaşı Emil Kurbedinov.

Ayrıca Qırımlı faaller piket iştirakçileriniñ videolarını derc eteler.

Ondan evel tutulıp alınğan faal Server Karametovke qoltutmaq maqsadınen Aqmescitteki Kreml nezareti altındaki Qırım MVD binası ögünde daa bir piket iştirakçisi tutılıp alınğanı aqqında belli oldı. Uquq qoruyıcılarnıñ malümatına köre tutulğan şahıs – Bahçasaraylı Osman Ablayev eken.

Kreml nezareti altındaki Yuqarı mahkeme binası, Qırımnıñ parlamenti ve ükümeti ögünde avgustnıñ 14-nde daa evel tutulıp alınğan qırımtatar esli-başlı faali Server Karametovke yalıñız başına yapılğan piketler keçirildi.

Amnesty International halqara uquqqoruyıcı teşkilâtı rusiyeli akimiyetten Server Karametovnı tez vaqıtta azat etmesine çağırğan edi.

Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.

Bundan evel ise mahkeme onı Rusiye Memuriy cinayetler Kodeksiniñ 20.2 maddesine binaen, qabaatlı olaraq tanıp, oña 10 biñ ruble (tahminen 4200 grivna) miqdarında para cezası tayinlegen.

Avgustnıñ 8-nde Aqmescitte, Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi.

76 yaşındaki Karametov Parkinson hastalığına tutulğan insandır.

Ukraina halq deputatı, qırımtatar halqı Meclisiniñ reisi Refat Çubarov Qırım Muhtar Cumhuriyeti prokuraturasına, qanunğa zıt kelgen şekilde Ukraina vatandaşı Server Karametovnıñ azatlıqtan marum etilmesi, onıñ işğal etilgen Qırımda barışıqsever miting keçirmesine mania olğanlarını bildirgen şikâyetnen muracaat etti. Prokuratura qırımtatar faaliniñ tutılıp alınğanı boyunca öz uquqiy noqtai nazarını bildirecegi aqqında haber etti.

Server Karametov işğal etilgen Qırımda bundan evelde tutılğan edi. Böylece, mayısnıñ 18-nde, qırımtatar halqı genotsidiniñ hatırası kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqanından soñ tutılıp alınğan edi. Üç saat tutılıp, oña qarşı memuriy protokol tizilgen soñ, o yiberilgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG