Kreml kontrol etken Aqmescitniñ Jeleznodorojnıy rayon mahkemesiniñ oturışında Rusiye akimiyeti tarafından «separatizmde» qabaatlanğan qırımlı jurnalist Nikolay Semena sorğuğa çekilip, Qırım halqara vesiqa ve añlaşmalarğa köre Rusiye terkibine kirmey, dep ayttı.
Avgustnıñ 3-de Qırım.Aqiqat mühbiri bildire ki, Nikolay Semena advokatnıñ sualine cevap berip, halqara uquq ceetinden devlet sıñırlarınıñ deñişmeleri olmadı, dep qayd etti.
Jurnalist Qırım.Aqiqat ile işbirligi aqqında tarif etip, bu saytnıñ yarımadada blok etilmesi qanunsız olğanını qayd etti. Prokuror Nikolay Semenağa Qırım.Aqiqat saytınen bağlı çoq sual berdi. Semena, davada qayd etilgen maqalesinde «Rusiye topraq bütünligini bozmağa çağırmağanını» ve Rusiye qanunlarını bozmağanını aytıp, qabaatını tanımağanını qayd etti.
Mahkeme oturışında qadı imayeniñ bütün muracaatlarını red etti.
Avgustnıñ 3-de Aqmescitniñ Jeleznodorojnıy rayon mahkemesiniñ oturışında qadı «Sova» ekspertler gruppasınıñ idare reisi Mihail Savva ve Qırım.Aqiqatnıñ baş muarriri Volodımır Prıtulanı şaat olaraq sorğuğa çekmege izin bermedi.
Radio Svoboda ve Qırım.Aqiqat müellifi, qırımlı jurnalist Nikolay Semena Rusiye akimiyeti tarafından «Rusiye Federatsiyasınıñ topraq bütünligini bozmaq içün kütleviy çağıruvlarda» qabaatlana. 2016 senesi aprel ayında Rusiyeniñ FSB hızmeti onıñ evinde tintüv ötkerdi, mayıs ayında ise o, Qırım.Aqiqatta maqale derc etkeni sebebinden, resmiy iddianame aldı. Şimdiki vaqıtta jurnalist Aqmescitte mahküm etile, ve şeerden çıqmaq aqqından marum etilgen.
Nikolay Semena, öz maqalelerinde «fikir bildirüv serbestligini» eda etkenini ayta.
Uquq qorçalayıcı ve jurnalistler teşkilâtları Nikolay Semenanıñ taqip etilmesini siyasiy basqı olaraq tanıy.
Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağıra.
