Aqmescitli «Hizb ut-Tahrir davasınıñ» mabüsi Rustem İsmailov Aqmescit SİZOsında ömür arqadaşınen körüşti. Bunı Qırım faali Osman Arifm Facebookta bildirdi.
Körüşüv İsmailov apiste yatqan doquz aydan soñ oldı. Ömür arqadaşınıñ aytqanına köre, körüşüv tam 10 daqqa sürdi.
«Rustem pek tendirist, ruhu küçlü, tebessümi yüzünde. Telefonlarnı qapatmağa rica etilgeni içün foto çıqarıp olamadım, maalesef. Amma er kes, tuvğanları, tanışları ve onı tüşüngen er keske ondan selâm aytam! Qoltutqanıñız, dua etkeniñiz içün pek minnetdar! Siziñ destegiñiz oña küç bere!», – dep yazdı o.
Bundan evel Aqmescitniñ Kyiv rayon mahkemesi Aqmescitli «Hizb ut-Tahrir davasınıñ» beş mabüsi Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovnıñ apis müddetini üç ayğa uzatqan edi. Advokatlar itiraz bildirdi, amma onıñ baqılması eki kere red etildi.
2016 senesi oktâbrniñ 12-de Qırımda beş qırımtatar qorantasınıñ evinde tintüv keçirildi. Tintüvler neticesinde beş qırımtatarı tutuldı, olarnı Rusiyede yasaqlanğan «Hizb ut-Tahrir» teşkilâtında iştirak etmesinde qabaatlaylar: Rustem İsmailov, Uzair Abdullayev, Teymur Abdullayev, Emil Cemadenov, Ayder Saledinov.
Fevral ayınıñ soñunda belli oldı ki, Rustem İsmailov ve Ayder Saledinovnı psihiatrik ekspertizağa yolladılar. Bundan evel Müslim Aliyev, Vadim Siruk, Enver Bekirov, Emir-Üsein Kuku, Arsen Cepparov, Refat Alimov, Remzi Memetov ve Enver Mamutov psihiatrik ekspertizadan keçken ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
