Avgustnıñ 2-de Qırımda tutulğan İçki rayonınıñ sakini Mamet Kürkçi narkotik maddeleriniñ qanunsız satışında şeklene. Avgustnıñ 3-ne mahkeme oturışı belgilendi, dep haber etti advokat Cemil Temişev.
Onıñ aytqanına köre, Kürkçi bunı inkâr etip, qabaatsız olğanını ayta. «Tuvğanları oña qarşı yasaqlanğan taqiqat usulları qullanılamı, onı uralarmı, dep bilmege rica ettiler. Zorbalıq izlerini men körmedim, Kürkçiniñ özü de onı qorquzmağanlarını ayttı», – dedi advokat.
Qırımtatar milliy areketiniñ faali Nariman Celâl Qırım.Aqiqatqa izaat berip, siyasiy taqip ola bilemi-yoqmı aytıp olamadı.
«O, (Mamet Kürkçi – QA) adiy bir köy sakini, traktorcı ola. Vatanperver biri, lâkin cemaat, cemaat-siyasiy faaliyeti olğanını kimse aytmadı. Bu işniñ siyasiy sebepleri bar olğanını aytıp olamaymız, lâkin oña qarşı çıqarılğan qabaatlarğa da razı degilmiz. Bilemiz ki, kerek olsa, insanlarğa qarşı Ceza kodeksiniñ maddeleri de qullanıla bile», – dep qayd etti Celâl.
İşğal etilgen Qırımnıñ İçki rayonında avgustnıñ 2-nde Üç-Quyu (Vostoçnoye) köyüniñ sakini Mamet Kurkçiniñ evinde tintüv ötkerildi. Qırımlınıñ telefonı tutıp alınılğanı ve özü İçki İşleriniñ Rayon Bölügine (ROVD binasına) ketirilgeni aqqında haber etilgen edi.
Rusiye Qırımnı işğal etken soñ yarımadada mustaqil jurnalistler, cemaat failleri, qırımtatar sakinleri muntazam surette tintüv ve soravlarğa oğray. Uquq qorçalayıcılar bunı «fikir farqlılığına qarşı küreş» olaraq tanıta.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
