Link açıqlığı

Kreml kontrol etken Aqmescitniñ Jeleznodorojnıy rayon mahkemesi apiske alınğan Server Karametovğa qoltutmaq içün bir özü narazılıq aktsiyasına çıqqan Yarikul Davlatovğa 10 biñ ruble (tahminen 4,3 biñ grn – QA) para cezasını berdi. Bunı avgustnıñ 14-de Qırım.Aqiqat mühbiri haber ete.

Oturışta qırımtatar faali oña qarşı tizilgen protokolnen razı olmağanını ayttı.

Mahkeme binası qarşısında qave satqan şaat Rustam Kuvatov Yarikul Davlatov «tahminen 15 daqqa yazılı şiarınen sessiz turdı, soñra ise onı politsiya alıp ketti», dep tarif etti.

Politsiya hadimi Artem Minin Pavlenko soq., 2 adresi boyunca Yuqarı mahkeme binası yanında bir kişilik piket ötkerilgenini kördi, dep bildirdi. «Vatandaş pasportını berdi, bu şekilde dindaşına qoltutqanını ayttı. Rayon bölügine davet ettik – qarşı çıqmadı», – dep ayttı Minin.

Qadı Yarikul Davlatov tam olaraq qayda olğanını, tükân ya da mahkeme binasına daa yaqın olğanını şaatlardan soradı. Kuvatovnıñ aytqanına köre, piket mesken evge daa yaqın edi. Politsiya hadimi ise narazılıq aktsiyası mahkeme binasına daa yaqın edi, dep israr ete.

Esli-başlı qırımtatar faali Yarikul Davlatov avgustnıñ 14-de Server Karametovğa qoltutmaq içün bir özü piket ötkergeninden tutuldı. Onı Aqmescitniñ Jeleznodorojnıy rayon idaresine alıp kettiler. Oña qarşı Rusiye memuriy cinayetler kodeksiniñ 20.2 maddesiniñ birinci qısmı – «qanunsız miting» içün – memuriy protokol tizildi.

Avgustnıñ 14-de Aqmescitniñ Kreml kontrol etken Yuqarı mahkeme, Qırımnıñ parlament ve ükümet binaları yanında apiske alınğan esli-başlı qırımtatar faali Server Karametovğa qoltutmaq içün bir kişilik piketler olıp keçti. Rusiye uquq qoruyıcıları miting iştirakçilerini tutmağa başladı. Çoqusı yiberildi.

Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.

Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.

Avgustnıñ 8-nde Aqmescitte Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşında Karametov Parkinson hastasıdır.


XS
SM
MD
LG