Link açıqlığı

Herson vilâyetinde «Hayat» radiosı yayın başlattı – Kostinskiy


İşğal etilgen Qırımnen sıñırdaş olğan Herson vilâyetinde Qırımnıñ yañı radiostantsiyası çalışıp başladı. «Hayat» radiosınıñ yayınları aqqında avgustnıñ 11-nde Ukrana tele ve radio yayınları meseleleri boyunca milliy şurasınıñ azası Sergiy Kostinskiy haber etti.

Onıñ sözlerine köre, soñki yıl devamında Tele ve radio yayınları meseleleri boyunca milliy şura ve Ukraina Haber siyaseti nazirligi «eki yañı qırımlı radiostatsiyasına can berdi», bular – «Hayat» radiosı ve Qırım.Aqiqat Radiosı, em de «Meydan» radiosı içün Geniçesk ve Çonğarda yayın yapmasına imkân berildi.

«Er bir radiostantsiya Herson vilâyetinde yayın yapmağa izin berecek serbest radio frekansları içün yarışlardan keçti ve Milliy şura tarafından tanıldı. Niayet, «Hayat» Radiosı Vasilyevkada 103.5 MHz frekansında yayınlap başladı. Nevbette «Qırım.Aqiqat Radiosı» Çonğardan, 105.9 MHz dalğasında yayınğa çıqmalı», – dep yazdı Facebookta Sergiy Kostinskiy.

Ukrana tele ve radio yayınları meseleleri boyunca milliy şurasınıñ azası, yañı radiostantsiyalar Hersonnıñ cenübiy tarafında ve Qırımda yayınlamaq içün yañı yarışlarda iştirak eteceklerine ümüt etkenini yazdı.

Martnıñ 17-nde Qırmnıñ memuriy sıñırı yanında Çonğar qasabasında tantanalı surette televizion ve radio qullesi açılğan edi. Onıñ sayesinde ukrain telekanalları ve radiostantsiyaları Rusiyeniñ istilâsına oğratılğan yarımadada yayın yapa bilecek.

Ukrana tele ve radio yayınları meseleleri boyunca milliy şurası iyülniñ 27-nde, yarışnı qazanıp işğal etilgen Qırımda yayın yapa bilecek beş ukrain telekanalını ilân etken edi. Bular: UA:Krım (NOTU), Çernomorskaya TRK, ICTV, «5 kanal» ve «Prâmıy» (Tonis). Telekanallarnı 200 biñ qırımlı seyir etecek.

Ukrana tele ve radio yayınları meseleleri boyunca milliy şurası tarafından Herson vilâyetinde tele-radio yayınlarnıñ inkişaf etmesini ve işğal etilgen Qırımda yayınlarnıñ pekitilmesini teminleycek strategiya leyhası azırlanılğan. Strategiyanıñ maqsadı – Herson vilâyetini analog ve raqamlı eşittirüvlernen teminlemek, ve bunen beraber Ukrainanıñ cenübiy rayonlarına işğal etilgen topraqlardan yollanılğan yayınlarnı kesmektir.

XS
SM
MD
LG