Rusiye Tışqı işler naziri Sergey Lavrov Qırımnıñ Ukraina nezareti altına berilüvini Leningradnıñ natsist ordusına teslim etilüvinen qıyasladı. Lavrov işbu sözlerini avgustnıñ 11-nde «Klyazmadaki territoriyalarnıñ manası» adlı, Bütünrusiye gençler tasil forumında ayttı, dep bildirmekte TASS.
Rusiye tışqı devlet idaresi yolbaşçısınıñ sözlerine köre, Qırımnı «qoşıp almamaq kerek edi» degen laqırdılar, Leningrad natsistlerge teslim etilmek kerek edi degen sözlernen aynı manadadır».
«Aqlıñızda olsa, yaqında pragmatizm pozitsiyasından yapılmğan bir davada, bir de-bir, menimce, liberal kanalda bir de-birisi, Leningradnı tutqandan köre, teslim etilmesi daa da uyğun olmaz edimi, o zaman daa az insan ölgen olur edi degen fikirni aytqan edi. Men bellesem, bu – Qırımdaki ruslarnı, Donbasstaki ruslarnı taşlap ketmeknen bağlı muzakerelerge oşay ve o meseleni añdıra», – dep qayd etti Lavrov.
«Qırımnı Kyivde avdarma yapqan ve böyleliknen devletniñ başına keçken şimdiki yolbaşçı natsistlerniñ eline teslim etmek, zanımca, cinayet olur edi», – dedi o.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
