Advokat Emil Kurbedinovnıñ fikirine köre, qırımtatar faili Server Karametovnıñ apis eilmesi – Rusiye akimiyeti tarafından teşkil etilgen qorqutıv aktsiyasıdr. Müşterine qarşı yapılğan taqip sebebinden advokat artıq halqara nüessiselerge muracaat etmek niyetinde. Bunı Kurbedinov, Kremlniñ nezaretindeki Qırım Yıqarı mahkemesi Karametovnı apisten çıqarmağa red etken soñ beyan etti.
«100% eminim ki, bu adiy qorqutuv tebiridir. İnsanlar özleri hülâsa çıqara. Çüniki 76 yaşındaki ihtiyarnı, o mında turıp «bizim ballarımız terrorist degil» dep aytqanı içün 10 künge apiske oturtmaq... Aqıl-fikirli adam mında neler olğanını özü añlay», – dedi Kurbedinov.
O dedi ki, imayeciler Qırımdaki mahkemeniñ qararına Rus mahkemelerinde degil de, halqara müessiselerde itiraz bildirmek niyetinde.
«Bügün olğanı bizge yeterli. Ve biz bu davanı halqara müessiselerge teslim etecemiz. Şu cümleden İnsan aqları boyunca Avropa mahkemesine de», – dep qayd etti Kurbedinov.
Failler içtimaiy ağlarda Server Karametovnıñ mahkemeden apishanede alıp ketilgenini köstergen video yayınladı.
Kremlniñ kontrolündeki Qırım Yuqarı mahkemesi avgustnıñ 11-nde esli-başlı qırımtatar faili Server Karametovğa on künlik memuriy cezağa qarşı bildirilgen itiraznı red etti ve onı avgustnıñ 19-na qadar apiste qaldırdı.
Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.
Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.
Avgustnıñ 8-nde Aqmescitte, Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşındaki Karametov Parkinson hastalığına tutulğan insandır.
Ukraina halq deputatı, qırımtatar halqı Meclisiniñ reisi Refat Çubarov Qırım Muhtar Cumhuriyeti prokuraturasına, qanunğa zıt kelgen şekilde Ukraina vatandaşı Server Karametovnıñ azatlıqtan marum etilmesi, onıñ işğal etilgen Qırımda barışıqsever miting keçirmesine mania olğanlarını bildirgen şikâyetnen muracaat etti.Prokuratura qırımtatar faaliniñ tutılıp alınğanı boyunca öz uquqiy noqtai nazarını bildirecegi aqqında haber etti.
Server Karametov işğal etilgen Qırımda bundan evel de tutılğan edi. Böylece, mayısnıñ 18-nde, qırımtatar halqı genotsidiniñ hatırası kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqanından soñ tutılıp alınğan edi. Üç saat tutılıp, oña qarşı memuriy protokol tizilgen soñ, o yiberilgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
