Qırımnıñ Qarasuvbazar rayonı Üç Köz köyüniñ üç sakinini, olarnıñ evinde avgustnıñ 10, cumaaqşamı künü ötkerilgen tüntüvden soñ, belgisiz tafaqa alıp kettiler. Bu aqra Qırım.Aqiqatqa Qırım insan aqları kontakt gruppasınıñ koordinatorı Abdureşit Cepparov ikâye etip berdi.
«Olarnıñ qorantası Tacikistandan köçip keldi. Olarnıñ migratsion vesiqaları tam manada tekmil degil. Neticede, biz olarnı ne yerge alıp ketkenleri ve olarğa ne yapılğanından haberimiz yoq. Olarğa qıynaydırlar dep qorqam», – dep ayttı uquq qoruyıcı.
Cepparovnıñ sözlerine köre, rus silâlı hızmet vekilleri saba saat 6-da evge bastırıp kirerek, qaba davranğan ve ev sakinlerini aqaretlegenler.
«Maskalı pek çoq insan, içi OMON tolu KAMAZ, OMON ketirgen mikroavtobus bar edi. Bu evde 55 yaşını keçken ana-baba, qadınları olğan balalı-çağalı üç erkek, dört bala olmaq üzre dört aile yaşay. Epsi olıp 12 can yaşağan ev. Silâlı hızmet vesiqalarında bu sade bir nezaret olaraq aks etilgen, lâkin bu bir tintüv edi, olar ahır ve bütün odalarnı da tinttiler, diniy kitaplarnı alıp kettiler», – dep ilâve etti Cepparov.
Onıñ qayd etkenine köre, uquq qoruyıcılar olarnıñ davasınen oğraşacaq, vaziyetni taqip eterek, üç erkekni tapmağa areket etecek.
Bu saba Qırımnıñ Qarasuvbazar rayonı Üç Köz köyünde rus silâlı quvvetleri soqaqlarnıñ birini qapatqanları aqqında belli oldı. Köyniñ bir evinde tintüv keçirilgeni aqqında qırımtatar Meclisiniñ reisi Refat Çubarov haber etken edi.
Qırımda Kremlniñ nezaretindeki silâlı hızmetlerniñ saytlarında Qarasuvbazar rayonında er angi bir areketler yapılğanı aqqında iç bir şey bildirilmey.
Bir kün evel Rus silâlı hızmetleri İslâm Terek qasabasınıñ sakini, qırımtatarı Umer Emiramzayevniñ evinde tintüv ötkergen ediler. Tintüv esnasında o yaramağanı içün hastahanege alıp ketile. Şimdilik bu adam nede qabaatlanacağı aqqında bildirilmey.
Qırım Rusiye tarafından isğal etilgen soñ, mustaqil jurnalist, qırımlı faaller, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlı olmasında şeklengen Qırım musulmanlarınıñ evlerinde pek sıq şekilde kütleviy tintüvler keçirilip başladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
