Link açıqlığı

Aqmescitli «Hizb ut-Tahrir davasınıñ» mabusları içün apis müddeti uzatıldı


Kremlge tabi olğan Aqmescit Kiyev rayon mahkemesi avgustnıñ 9-nda Aqmescitli «Hizb ut-Tahrir davasınıñ» mabusları içün apis müddetini uzattı. Uzair Abdullayev, Teymur Abdullayev ve Emil Cemadenov daa eki ayğa azatlıqtan marum etildi. Bunı Qırım.Aqiqat muhbiri haber ete.

Olardan ögüne ise Ayder Saledinov ve Rustem İsmailov içün apis müddeti eki ayğa uzatılğanı haber etken edi.

Daa evel Aqmesctiniñ Kiyev rayon mahkemesi Aqmescitli «Hizb ut-Tahrir davasınıñ» daa beş mabusı –Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovnıñ içün apis müddetini üç ayğa uzatqan edi. Advokatlar itiraz bildirdi, amma onıñ baqılması eki kere red etildi.

2016 senesi oktâbrniñ 12-de Qırımda beş qırımtatar qorantasınıñ evinde tintüv keçirildi. Tintüvler neticesinde beş qırımtatarı tutuldı, olarnı Rusiyede yasaqlanğan «Hizb ut-Tahrir» teşkilâtında iştirak etmesinde qabaatlaylar: Rustem İsmailov, Uzair Abdullayev, Teymur Abdullayev, Emil Cemadenov, Ayder Saledinov.

Fevral ayınıñ soñunda belli oldı ki, Rustem İsmailov ve Ayder Saledinovnı psihiatrik ekspertizağa yolladılar. Bundan evel Müslim Aliyev, Vadim Siruk, Enver Bekirov, Emir-Üsein Kuku, Arsen Cepparov, Refat Alimov, Remzi Memetov ve Enver Mamutov psihiatrik ekspertizadan keçken ediler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG