Rusiyeli bloger Aleksandr Gornıy Facebook’ta, bozulğan asfalt ve çuqurlarnı köstergen fotoresimlerni derc eterek, Qırımda ağır yük maşnaları yollarnı boza dep bildire.
Gornıyniñ sözlerine köre, o resimlerni Pervomayskoye köyü etraflarında çekken eken.
«Qırım yollarınıñ işi harap. Misli olmağan sıcaq ve ağır yük maşnaları Qırım yollarını çöplük obasına çevirip taşlay. Men bu resimlerni Pervomayskoye köyü etrafında çekken maalde tışarıda+30C sıcaq bar edi», – dep yaza Gornıy.
İyülniñ 1-nden itibaren Qırımda sıcaq künler devamında yük maşnalarınıñ yolda yürmesinen bağlı yasaq kirsetilgen edi. Yasaq sentâbrniñ 30-na qadar devam etecek.
Qırım akimiyeti paromdan kelgen büyük yük maşnaları Keriçniñ tek yollarını degil de, binalarını da harap etkenini qabul etti. Yük maşnalarını başqa yoldan yürsetmege imkân olmağanından şeer şurasına qomşu Rusiyeniñ bücetinden tazminat istemesi tevsiye etildi.
