Link açıqlığı

Donbass ve Qırımdan köçüp kelgen balalar Romaniyada raatlandı – elçihane


İşğal altındaki Qırım em de Donetsk ve Lugansk vilâyetlerinden mecburen köçüp kelgen ailelerniñ evlâtları Romaniyanıñ Repedya şeerinde raatlandılar, dep bildire avgustnıñ 9-nda Ukrainanıñ Romaniyadaki elçihanesi.

«İyülniñ 31-nden avgustnıñ 9-na qadar Maramureş uyezdi idaresiniñ davetine binaen Donetsk ve Lugansk vilâyeti em de Qırım Muhtar Cumhuriyetinden mecburen köçüp kelgen 11 ukrainalı baladan teşkil etilgen gruppa Romaniyanıñ Repedya şeerinde raaatlandı. Ziyaret Ukrainanıñ Romaniyadaki elçihanesi ve şeer yolbaşçısı İoann Mikolayçuk ve Maramureş şeeri idaresiniñ temsilcisi qoltutuvınen teşkil etildi», – denilmekte haberde.

Elçihane bergen malümatqa köre, ukrainalı balalar «Druzya» adlı halqara gençler lagerindeki tedbirlerde iştirak eterek, yerli ukrain cemaatınıñ ananelerinen tanışıqan ve Romaniyanıñ bir qaç şeerini ziyaret etkenler.

2014 senesi mart ayında Rusiye Qırımnı işğal etken soñ, yarımada sakinleriniñ bir qısmı Ukrainanıñ esas toprağına köçmege mecbur qalğan edi. 2017 senesi iyülniñ 24-ne köre, işğal altındaki Qırım ve Kyivniñ nezareti tışında qalğan Donbasstan 1 mln 580 biñ 646 şahıs ya da 1 million 270 biñ 372 aile köçüp kelgendir, dep bildire Ukraina informatsion siyaseti nazirliginiñ matbuat hızmeti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG