Link açıqlığı

QMC prokurorı: Qırımnıñ tamır halqlarına yapılğan zulum – arbiy cinayet sayıla


QMC prokurorı Gündüz Mamedov

Rusiyeli akimiyet tarafından işğal altındaki Qırımda yaşağan tamır halqlarnıñ aq-uquqlarına qarşı yapılğan zulum arbiy cinayet dep sayıla ve buña mahkeme ve dünya cemaatçılığı qıymet kesecektir. Bu aqta Qırım MC prokurorınıñ halqara Halqara Tamır halqlar Künü qayd etilüvi munasebetinen yapqan muracaatında söz yürsetilmekte.

Gündüz Mamedov Qırımda yaşağan tamır halqlar temsilcileriniñ aq-uquqları sistemetik ve mıqyaslı şekilde bozulğanına diqqat çekti.

«Olar kendi toprağında ür bir şekilde inkişaf etme, ana tilinde tasil alma ve dinini kütme aqqından marum etilmekteler. Qırımtatar halqına qarşı basqı yapıla, Qırımnıñ Ukraina toprağı olğanı hususında faal tarzda öz noqtai- nazarını bildirgen yarımada sakinleri repressiyalarğa oğratıla, şahıslar milliy ve etnik alametlerine köre taqip etile. Bu sebepten dolayı Qırım tamır halqlarınıñ temsilcileri yarımada zapt etilgen soñ onı terk etmege mecbur qalğan ediler», – denilmekte muracaatta.

QMC prokurorı idare hadimleri Qırımnıñ işğal etilmesinde qabaatlı olğan ve yarımadada insan aqlarını bile-bile bozğan mesul şahıslarnı mesuliyetke celp etmek içün bütün ğayretlerini köstermege devam eteceklerine işandırdı.

«Ondan da ğayrı bizler halqara mahkeme teşkilâtlarına berilmek üzre işğalci akimiyetniñ qanunğa zıt kelgen bütün areketlerinen bağlı isbatlarnı toplamağa devam etmektemiz», – dep qayd etti Mamedov.

Halqara Tamır halqlar Künü er sene avgustnıñ 9-nda qayd etile. Böyle bir kün BMT Baş Assambleyasınıñ rezolütsiyası ile 1994 senesi tayin etilgen edi.

Ukrainada bu sebepten bir qaç tedbir keçirilmesi planlaştırıla.

2014 senesi martnıñ 20-nde Yuqarı Rada qırımtatarlarnı Qırımnıñ tamır halqı dep tanıdı. Bu qararğa 283 deputat qoltutqan edi. Ukraina tamır halq olğan qırımtatarları ve diger milliy azlıqlarnıñ etnik, medeniyet, til ve din hususiyetleriniñ saqlap qalması ve inkişafına kefil olacağını vade etti.

XS
SM
MD
LG