Link açıqlığı

Çiygoz mahkemede: devletniñ bütünligini mitingte qorumaq – vatandaşnıñ borcı


Qırımtatarlarnıñ yetekçilerinden biri Ahtem Çiygoz avgustnıñ 9-nda Kremlniñ nezaretindeki Qırım Yuqarı mahkemesinde dedi ki, onıñ davası siyasiy hususiyetlerini taşıy ve 2014 senesi fevralniñ 26-nda o, Ukraina Konstitutsiyası ve qanunları esasında, «öz devletiniñ bütünligini qorçalay edi».

«Öz devletiniñ bütünligini qorumaq – vatandaşnıñ boyun borcıdır. Bu borcım edi! Qanunğa qarşı areket yapmaq niyetim yoq edi, biz barışıqlı miting ötkergen edik», – dedi Çiygoz.

O qayd etti ki, onıñ sözleri doğru olğanını isbatlağan video-malümat mahkemecige berilgen.

Ahtem Çiygoznıñ sözlerine köre o, oña qarşı mahkeme qırımtatar halqını qorqutmaq maqsadınen yapılğanını tüşüne. Bunen beraber o, qabaatlayıcı tarafnıñ taqdim etkeni üç «gizli şaatınıñ» ifadelerini tenqit etti.

Kremlge tabi olğan Qırım Yuqarı mahkemesinde avgustnıñ 9-nda apis etilgen qırımtatar yetekçilerinden biri Ahtem Çiygoznıñ davası esnasında munaqaşalar devam ettirildi.

Avgustnıñ 7-de Kreml kontrol etken Qırım Yuqarı mahkemesiniñ «Çiygoz davasınıñ» oturışında prokuror Anastasiya Suprâga Ahtem Çiygoz 8 yılğa azatlıqtan marum etilgenini istedi.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG