Link açıqlığı

Saatnıñ esas haberi

Uquq qorçalayıcı: rusiyeli silâlı hızmetler İslâm Terek sakininde ötkerilgen tintüvniñ sebeplerini öyle de añlatmadı


Rusiyeli silâlı hızmetler İslâm Terek sakini, qırımtatarı Umer Emiramzayevniñ evinde ötkerilgen tintüvniñ sebeplerini alâ daa añlatmadı. Bunı avgustnıñ 9-nda Qırım.Aqiqatqa bergen izaatında Qırım insan aqları bağ gruppasınıñ koordinatorı Abdureşit Cepparov bildirdi.

«Rus silâlı hızmetçilerinden iç biri tintüv sebeplerini öyle de añlatmadı. Olar fermannı adam-aqıllı köstermedi. Ağası fermannıñ bir qısımını oqup oldı, amma soñ o elinden çekip alındı. Aqılında qalğanı: Umer, sanki, terroristik teşkilâtnen bağlı olğanında, milletlerara zıddiyet çıqarğanında şeklene», – dedi Cepparov.

Uquq qorçalayıcnıñ sözlerine köre, Emiramzayevniñ evinde olıp keçken adise «tintüv olaraq adlanmaz».

«Biz bunı ücüm kibi tanıymız. Tintüv – bu belli bir tertiptir. Yüz bergen adise ise – iç bir tertipke uymay. Ev saipleri ne olıp keçkenini añlağance, silâlı hızmetler endi ev içine kirgen. Olar er kesge bir odağa keçmege emir etti; aynı zamanda birden bütün odalarnı tintip çıqtı, ne saipler, ne şaatler yoq edi; aile azalarını sorğuğa çekti; ömür arqadaşına bir kâğıt imzalamağa teklif etken, amma o razı olmadı. Bundan soñ oña bağırıp, qorqutmağa başlağanlar», – dedi uquq qorçalayıcı.

İslâm Terek qasabasınıñ sakini, qırımtatarı Umer Emiramzayev, avgustnıñ 9-nda saba onıñ evine Rus silâlı hızmetleri tintüv ötkermek içün kelgen soñ, pek yaramağan. Oña acele yardım maşnası çağırttırıldı ve kendisi hastahanege alıp ketildi.

Qırımdaki Kremlniñ nezaretindeki silâlı hızmetlerniñ saytlarında tintüvniñ sebepleri aqqında iç bir şey bildirilmegen.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG