Avgustnıñ 9-nda saba rusiyeli küç sturkturası hadimleri İslam Terek (Kirovskoye) qasabası sakininiñ evinde tintüv yapmaq maqsadınen kelgenlerinde onıñ sakini, qırımtatarı Umer Emiramzayev yaramadı. Onıñ içün acele yardım maşnası çağırıldı. Bu aqta avgustnıñ 9-nda Qırım.Aqiqatqa bergen izaatında qırımlı advokat Edem Semedlâyev haber etti.
«Şimdilik yalıñız Umer Emiramzayev içün acele yardım maşnası çağırılğanı aqqında belli. Nede qabaatlanacağı belli degil. Advokatımız o qasabağa yollanıldı», – dedi Semedlâyev.
Qırımtatar faali Abdullah Yakubov Qırım.Aqiqatqa bildirgenine köre, Emiramzayevniñ miyinde damarlarınıñ malformatsiyası bar eken.
Avgustnıñ 9-nda çarşenbe künü sabadan rusiyeli küç sturkturası hadimleri Qırımdaki İslam Terek (Kirovskoye) qasabası sakini Umer Emiramzayevniñ evinde tintüv yapmaq maqsadınen keldiler. Bu aqta ictimaiy ağlarda uquq qoruyıcılar ve faaller haber bermekte. Kreml nezareti altındaki Qırım küç idareleri saytlarında tintüv sebepleri aqqında haber etilmey.
Qırım Rusiye tarafından isğal etilgen soñ, mustaqil jurnalist, qırımlı faaller, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlı olmasında şeklengen Qırım musulmanlarınıñ evlerinde pek sıq şekilde kütleviy tintüvler keçirilip başladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
