Avgustnıñ 9-nda İslâm Terek qasabasında Rus silâlı hızmetleri tarafından tintilgen Umer Emiramzayevniñ evi yanına onlarnen adamlar keldi. O yerdeki politsiya hadimleri kelgenlerni «akimiyet vekillerine qarşı açıq aqaret» ve «izinsiz kütleviy toplaşuv» içün qanuniy mesüliyet aqqında hatırlata.
O yerden video-levhalarnı qırımlı failler yayınlay.
Videoda körüne ki, Emiramzayevni desteklemek içün kelgenler dua oquy, olarnı silâlanğan uquq qorçalayıcılar sarıp alğan. Silâlı hızmetçilerniñ bazıları olarnı videoğa çeke.
Qırımtatar faili Abdullah Yakubov Qırım.Aqiqatqa bergen izaatında: «Ket-kete daa çoq adam toplaşa, Umer Emiramzayev – namlı biridir, İslâm Terek rayonında adamlar onı pek seve, o yerli molladır, o et sata ve yerli sakinlerge et satmağa yardım ete», – dep ayttı.
Rusiyeli silâlı hızmet hadimleri çarşenbe künü, avgustnıñ 9-nda, İslâm Terek qasabasınıñ sakini Umer Emiramzievniñ evini tintmek içün kelgen. Bunı içtimaiy ağlarda qırımlı uquq qorçalayıcı ve failler haber etti.
Qırımdaki Kremlniñ nezaretindeki silâlı hızmetlerniñ saytlarında tintüvniñ sebepleri aqqında iç bir şey bildirilmegen.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
