Ukrainada tamır halqlarından olğan – qaray ve qırımçaqlarınıñ – sayısı bir-qaç biñ insannı teşkil ete. Bunı Ukraina Haber siyaseti naziriniñ birinci muavini Emine Ceppar avgustnıñ 8-nde matbuat konferentsiyası devamında beyan etti.
Cepparnıñ sözlerine köre, bu tamır halqları «ayatta saqlanmaq içün» destekke muhtac.
«Qırımtatarlarnıñ ikâyesi biraz farqlıdır, bu halq Ukraina tarafdarlığı sebebinden Qırımda şiddetli basqılarğa oğratıla. Bu halq, kerçekten, qasten yoq etilmekte. Ve biz añlaymız ki, Ukraina içün birinci vazife – bu halqnı qorumaqtır», – dedi Ceppar.
Avgustnıñ 8-nde Ukraina Haber siyaseti nazirligi Halqara tamır halqları künü munasebetinen avgustnıñ 9-nda başlatılacaq umummilliy alâqa kampaniyasını taqdim etti. Umummilliy alâqa kampaniyası ilân tahtaları, şeer ilânları ve video-levhadan ibaret. Olar «Üç halq – bir tamır» şiarı ile birleştirilgen.
Halqara Tamır halqlarınıñ Künü er sene avgustnıñ 9-nda qayd etile. Böyle bir kün BMT Baş Assambleyasınıñ rezolütsiyası ile 1994 senesi tain etilgen edi.
2014 senesi martnıñ 20-nde Yuqarı Rada qırımtatarlarnı Qırımnıñ tamır halqı olaraq tanıdı. Bu qararğa 283 deputat qoltutqan edi. Ukraina qırımtatarlarnıñ tamır halqı olaraq etnik, medeniyet, til ve din hususiyetleriniñ saqlap qalması ve inkişafını kefil etmege vade etti.
