Link açıqlığı

Rusiyeli silâlı hızmetler tintüv keçirmek içün Qırımda İslâm Terek qasabasınıñ sakinine kelgen – failler


Nümünelik fotoresim

Rusiyeli silâlı hızmet hadimleri çarşenbe künü, avgustnıñ 9-nda, İslâm Terek qasabasınıñ sakini Umer Emiramzievniñ evini tintmek içün kelgen. Bunı içtimaiy ağlarda qırımlı uquq qorçalayıcı ve failler haber etti.

Tintüv tahminen saat 7:30 başlandı, evni silâlı hızmetçiler sarıp aldı. Qırımlı Abdullah Yakubovnıñ bildirgenine köre, Umerni desteklemek içün onıñ yanına adamlar kele.

Yakubov adise yüz bergen yerde çekilgen video-levhanı da yayınladı. Video resimlerinde Emiramziyevni desteklemek içün kelgen bir-qaç onluq adam, ketirilgen silâlı hızmetçiler ve o yerniñ yanında qoyulğan apis maşnası körünmekte.

«Umer Emiramziyev yerli molladır ve İslâm Terek rayonında üemtli adamdır, yerli sakinler onı dindar adam olaraq, ancaq yahşı taraftan tanıy. O çoqbabalı babadır ve özü de çoqbalalı ailede doğğan», – dep qayd ete Abdullah Yakubov.

Qırımdaki Kremlniñ nezaretindeki silâlı hızmetlerniñ saytlarında tintüvniñ sebepleri aqqında iç bir şey bildirilmegen.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG