Link açıqlığı

«V.İ.Vernadskiy adına Qırım federal universitetniñ» (KFU) rektorı vazifesini vaqtınca eda etmesi maqsadınen bunıñ arfesinde istifağa ketken Sergey Doniç yerine, daa evel Ulu Pötr adına Sankt-Peterburg politehnilka universiteti ileri sanayı tehnologiyaları institutınıñ yolbaşçısı olğan Andrey Falaleyev tayin etildi. Bu aqta avgustnıñ 8-zi, salı künü Kreml nezareti altındaki Qırım ükümetiniñ matbuat hızmeti bildirmekte.

«Tedbir esnasında (Falaleyev aliy oquv yurtınıñ közetüv şurasınen tanıştırlğan maalde – QA) Rusiye Federatsiyası maarif ve ilim nazirligi devlet memurları ve kadrlar departamenti müdiriniñ yardımcısı Vera Samorodova, Rusiye Federatsiyası maarif ve ilim naziri Olga Vasilyevanıñ V.İ.Vernadskiy adına KFU rektorı vazifesinden Sergey Doniçniñ istifa etkeni ve yerine rektor vazifesini vaqtınca eda etmek içün Andrey Falaleyev tayin etilgeni aqqındaki qararını oqudı», – denilmekte haberde.

Sergey Doniç KFU rektorı vazifesine 2014 senesinden bu küngece çalışıp kelgen edi ve tünevin o istifağa ketkeni aqqında belli oldı.

2015 senesiniñ başında Qırımnıñ Rus akimiyeti yarımadada «federal universitetniñ» tesis etilmesini avale etken edi. Onıñ erkânına bir-qaç oquv yurtı kirdi – şu sırada yoq etilgen arasında Vernadskiy adına Qırım Tavriya Universiteti, Georgiyevskiy adına Qırım devlet tibbiyet universiteti ve diger ilmiy müessiseler şu cumledendir. «Qırım federal universitetiniñ» erkânına tahminen 13 tasil ve ilim teşkilâtı kirmekte.

Sergey Doniç istifasınıñ sebepleri ve bu vazifege vaqtınca tayin etilgen yañı rektor aqqında Qırım.Aqiqatnıñ «Игра престолов» в КФУ: почему Донича свергли с поста ректора» materialında oquybilesiñiz.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG