Link açıqlığı

İşğal etilgen Qırımda «V.İ. Vernadskiy adına Qırım federal universitetiniñ» (KFU) müdiri Sergey Doniç, vazifesinden boşatılmaq içün öz isteginen istifa arizasını yazğan. Bunı avgustnıñ 7-nde Qırımdaki kütleviy haber vastaları bildire.

Yarımadadaki akimiyetni desteklegen «Krıminform» agentligi, istilâ etilgen Qırımnıñ tasil ve ilim nazirligindeki menbalarına atıf etip, müdirlik vazifesini Andrey Falaleyev eda etecegini haber ete.

Aqyarlı «Primeçaniya» neşiri bildire ki, Falaleyev eñ keç avgustnıñ 9-na, çarşenbe kününe qadar işini başlamaq kerek.

KFU hadimleri sırasından mustaqil menbalar, Sergey Doniçniñ istifası aqqında malümat doğru olğanını Qırım.Aqiqatqa tasdiqladı.

Bu haberniñ resmiy tasdığı ne KFU, ne de Kremlge tabi olğan Qırım Tasil nazirliginiñ sitesinde bildirilmegen. Doniçniñ özü de resmiy beyanat seslendirmegen.

Sergey Doniç 2014 senesi oktâbr ayından berli KFU yolbaşçı ola.

2015 senesiniñbaşında Qırımnıñ Rus akimiyeti yarımadada «federal universitetniñ» tesis etilmesini avale etken edi. Onıñ erkânına bir-qaç oquv yurtı kirgen – şu sırada yoq etilgen Vernadskiy adına Qırım Tavriya Universiteti, Georgiyevskiy adına Qırım devlet tibbiyet universietti, ve bazı başqa ilmiy müessiseler. «Qırım federal universitetiniñ» erkânına tahminen 13 tasil ve ilim teşkilâtı kirmekte.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG