Kreml kontrol etken Aqmescitniñ Jeleznodorojnıy rayon mahkemesiniñ qadısı avgustnıñ 7-de «Qırım diversantları davasınıñ» mabüsi Redvan Suleymanovğa üküm çıqarmaq içün toplaşuv odasına ketti. Üküm avgustnıñ 10-da saat 10:00 seslendirilecek, dep bildire Radio Svoboda mühbiri.
Avgustnıñ 7-de olıp keçken oturışta Redvan Suleymanov soñki sözüni ayttı.
«Qabaatımnı tanıyım, yapqanımdan peşmanım. Zarar ketirgenimni tanımayım. Bu zararnıñ miqdarı bir yerde isbatlanmağan. Apiste yatqanım yeterli olğanını tüşünem, yapqanlarımnıñ mesüliyetini yahşı añlayım», – dedi Suleymanov.
Avgustnıñ 2-de prokuror «Qırım diversantları davasınıñ» mabüsi Redvan Suleymanov eki yılğa azatlıqtan marum etilmesini istedi.
Redvan Suleymanov 2016 senesi Siyülniñ 30-da Aqmescit ava limanında yaqalanğan edi. Avgustnıñ 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
«Qırım diversantları davasınıñ» mabüsi Redvan Suleymanov mahkemede qabaatını tanıdı, lâkin büyük zarar ketirgeninen razı olmadı, dep haber etilgen edi.
