Link açıqlığı

Rusiye Qrımdan çıqqan ukrain askerleriniñ evlerini tutıp ala – uquq qorçalayıcı


İşğal etilgen Qırımda qomşu Rusiyeniñ uquq qoruyıcı organları yarımadanı terk etken ukrain askerleriniñ evlerini tutıp ala. Bunı avgustnıñ 1-de Ukraina insan aqları Helsinki birliginiñ uquqçısı Maksim Timoçko Kyivdeki «Qırımda Rusiye askerleriniñ qanunsız areketleri» matbuat konferentsiyasında ayttı, dep bildire Qırım.Aqiqat mühbiri.

Onıñ malümatına köre, böyle bir areketlerden soñkisi 2017 senesi iyül ayında qayd etilgen edi.

«Şimdige qadar mülkniñ qanunsız tutıp alınmasına dair onğa yaqın haberimiz bar. Daa 15 qoranta olarnı qorquzğanlarını bildirdi. Qırımnıñ işğalci akimiyeti bunı Rusiye Federatsiyası, Rusiye Mudafaa nazirliginiñ mal-mülki olaraq tanıy», – dep tarif etti Timoçko.

Uquq qorçalayıcı Rusiye uquq qoruyıcılarınıñ bu areketleri halqara añlaşmalarnı boza ve «qayd etilip, halqara cinaiy mahkemege yetkizilmeli», dep qoştı.

Rusiye Qırımnı işğal etken soñ bir çoq ukrain askeri yarımadanı terk etti. 2017 senesi iyülniñ 24-ne qadar işğal etilgen Qırım ve Kyiv kontrol etip olamağan Donbass regionlarından tahminen 1 mln 580 biñ 646 kişi çıqtı, bu 1 million 270 biñ 372 qoranta ola.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG