İşğal etilgen Qırımda Kremlniñ nezaretindeki Yuqarı mahkeme avgustnıñ 4-nde «Hizb ut-Tahrir davasınıñ» altı mabusına apis müddetini oktâbrniñ 8-ne qadar uzatqan. Emir-Usein Kuku ve Vadim Siruktan ğayrı Enver Bekirov, Muslim Aliyev, Refat Alimov ve Arsen Cepparov apiste qalacaqlar. Bunı, qırılmlı fail Gulsum Aliyevağa atıf etip, Qırım uquq qorçalayıcı taqımı bildire.
«Apis muddetiniñ uzatılması aqqında muracaat FSB taqiqatçısı Sergey Mahnöv tarafından berilgen. Qararnı «mahekemeciler» Anatoliy Osoçenko, Yelena Mihâlkova, Aleksey Kozırev, Yuriy Latınin, İgor Krüçkov qabul ettiler», – dep haber etti uquq qorçalayıcılar.
Yaltalı «Hizb ut-Tahrir davasınıñ» mabusları Arsen Cepparov ve Refat Alimov, 2016 senesi aprelniñ 18-nde Qızıltaşta tutılıp, şimdige qadar azatlıqtan marum etilgenler. «Hizb ut-Tahrir davasınıñ» ilk yaltalı mabusları 2016 senesi fevralniñ 11-nde tutılğan edi. Olarnıñ arasında – İnsan aqları boyunca bağ taqımınıñ azası Emir-Usein Kuku, aluştalı Muslim Aliyev ve qızıltaşlı Enver Bekirov, olar qurucılar olıp çalışa edi, ve yaltalı çiçek satıcısı Vadim Siruk.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
