Link açıqlığı

Qırımda «Semena davasınıñ» mahkemesinde imayecilerniñ bütün muracaatları red etildi – advokat


Qırımlı jurnalist Nikolay Semenağa qarşı açılğan davanıñ nevbetteki mahkeme toplaşuvında avgustnıñ 3-nde Kremlniñ nezaretinde çalışqan Aqmescitniñ Demiryor rayon mahkemesinde imayecilerniñ bütün muracaatları red etildi. Bunı Qırım.Aqiqatqa mahkümniñ advokatı Aleksandr Popkov haber etti.

«FSB organlarından lisaniyatçı-ekspertniñ esaslanğanı uslübiy tevsiyelerni almağa rica etecek oldıq. Onıñ sözlerine köre, tevsiyelerde sarfiy hatalar mevcut edi. Hatalardan şübelendik. Mahkeme ise ricamıznı red etti», – dedi Popkov.

Advokat, qabul etile bilinmeycek delillerniñ çıqarıp alınılmasına dair muracaat ta red etilgenini ayttı.

«FSB hadimleri feza ve vaqıtnı idare etmege ögrengen. Taqiqatçı tarafından sentâbrniñ 15-nde yollanılğan avaleni, vesiqalarğa binaen, olar bir kün evel, sentâbrniñ 14-nde eda etkenler. Em de vesiqalarnı kelecek zamandan qabul etkenler – aynıñ 18-nci kününden. Biz olarnı çıqarmağa rica ettik, çünki olar Cinaiy ceryan kodeksini ve bir-çoq qanunnı bozğan ola, amma mahkeme bunı da red etti. Vesiqalar em keçmişten, em de kelecekten nasıl kelgenlerini prokuror da añlatıp olamadı», – dep tarif etti Popkov.

Advokatnıñ sözlerine köre, Ukrainanıñ qıtaiy qısımında bulunğan Qırım.Aqiqat reberi Volodımır Prıtulanı ve siyasetşınas-mutehassıs Mihail Savvanı sorğudan keçirmek içün Ukrainadan adliyeviy yardımnıñ berilmesi aqqında muracaatnı da mahkemeciler red etken. Popkov dedi ki, mahkeme olarnıñ ifadelerini emiyetli olaraq tanımadı.

Advokat bildirdi ki, toplaşuv devamında imaye içün kerekli olğan vesiqalar ilân etildi: BMT Baş Assambleyasınıñ rezolütsiyası, Ukrainanıñ topraq bütünligine dair OSCE rezolütsiyası, ve ruhiyatçı ile lisaniyatçınıñ hulâsaları.

Nevbetteki toplaşuv avgustnıñ 31-ne saat 14:00 tain etildi.

Bundan evelki toplaşuvda «Semena davasını» alıp barğan mahekemeciler imaye tarafınıñ mutehassıslarını, ve Nikolay Semenanıñ davası içün hulâsa azırlağan Rusiye FSB ekspertiniñ ifadelerini diñlegen oldı. Bunen beraber mahkeme Qırımda insan aqları aqqında BMT Baş Assambleyasınıñ rezolütsiyasını da dava malümatlarına qoştı, onda jurnalistlerniñ aqlarına dair bir qısım mevcut.

Radio Svoboda ve Qırım.Aqiqat müellifi, qırımlı jurnalist Nikolay Semena Rusiye akimiyeti tarafından «Rusiye Federatsiyasınıñ topraq bütünligini bozmaq içün kütleviy çağıruvlarda» qabaatlana. 2016 senesi aprel ayında Rusiyeniñ FSB hızmeti onıñ evinde tintüv ötkerdi, mayıs ayında ise o, Qırım.Aqiqatta maqale derc etkeni sebebinden, resmiy iddianame aldı. Şimdiki vaqıtta jurnalist Aqmescitte mahküm etile, ve şeerden çıqmaq aqqından marum etilgen.

Nikolay Semena, öz maqalelerinde «fikir bildirüv serbestligini» eda etkenini ayta.

Uquq qorçalayıcı ve jurnalistler teşkilâtları Nikolay Semenanıñ taqip etilmesini siyasiy basqı olaraq tanıy.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağıra.

XS
SM
MD
LG