Ukraina Tışqı işler nazirligi Qırımnıñ siyasiy mahkümi, qırımtatar milliy areketiniñ liderlerinden biri İlmi Umerovnıñ 60 yıllığını tebrikledi.
Ukraina Tışqı işler nazirliginiñ spikeri Maryana Betsa avgustnıñ 3-de Twitterde İlmi Umerovğa sağlıq tiledi.
«İlmi Umerovnıñ yubileyi hayırlı olsun! Küç ve sağlıq tileymiz. İşğalcini beraber yeñermiz», – dep aytıla hayırlavda.
İlmi Umerovnı Rusiye advokatları Nikolay Polozov ve Mark Feygin de hayırladılar, olarnıñ fotoresimini qırımlı Zair Smedlâyev derc etti.
Rusiye uquq qorçalayıcısı Aleksandr Podrabinek Facebookta Umerovnıñ 60 yıllığını tebriklep, İlmi Umerov «vatanı yat bir memleket tarafından işğal etilgenine baqmadan, yubileyini tuvğan toprağında qayd ete», dep yazdı.
Cumaaqşamı künü, avgustnıñ 3-de, İlmi Umerovnıñ qızı Ayşe Qırım.Aqiqatqa bildirdi ki, İlmi Umerov 60 yıllığını dost ve meslekdeşlerinen qayd etecek.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
