Qırımda avgustnıñ 4-9-da pek sıcaq ava olması beklenile. Bunı işğal etilgen yarımadanıñ Kreml kontrol etken Fevqulâde vaziyetler nazirligi bildire.
«Qırımnıñ gidrometeorologiya ve tabiat monitoringi idaresiniñ» malümatına köre, avgustnıñ 4-9-da Qırımda pek sıcaq ava olması beklenile: avanıñ arareti iklim normasından 7 derece yüksek olacaqtır», – dep aytıla haberde.
Qurtarıcılar küneş çarpması aqqında hatırlatıp, böyle vaziyetlerde yapılacaq areketler aqqında ayta: zarar körgen kişi kölgege alına ya da töşekke yatqızıla, çoq suv içtirile, başına suvuq bir şey qoyula. Sıcağı köterilse, ilâc berile. Ava kirgen odada qalmalı. Alı pek ağır olsa, insannı dım çarşafqa saralar, kerek olsa, yürek ilâcları berile. Ekim kelgenine qadar suvuqlatmağa devam etmeli ya da zarar körgen kigini hastahanege alıp ketmeli.
