Qırımtatar Milliy Meclisi «Qırım birdemligi» teşebbüsi ilân etken «Qırım marafonı» aktsiyasına qoşuldı. Bunı Meclis reisi Refat Çubarov avgustnıñ 3-de bildirdi.
Çubarov aktsiya devamında Qırımda qırımtatarlarğa berilgen para cezalarını ödemek içün sermiya toplanğanını hatırlattı. Para 10 rublelik kapik (tahminen 4 grn 35 kapik – QA) olaraq toplana.
«Dedik ki, onlarnen kilogramm maden, toplanğan ve Rusiye işğalcileriniñ yüzüne taşlanacaq on biñlernen 10 rublelik Rusiye kapigi arasında bizim Kyivden yollağan paramız da olmalı. Bunıñ içün tapqanımız Rusiye kapiklerini özüni zorlap qolumızğa aldıq, çünki bu memleket Ukrainağa istilâ etti ve Qırımnı işğal etti», – dep yazdı Refat Çubarov Facebookta.
İyülniñ 29-da «Qırım birdemligi» birleşmesiniñ toplaşuvını faaller qırımtatar halqınıñ birligi ve işğal etilgen yarımadada akimiyetniñ yapqan repressiyalarına qarşı küreş yollarına bağışlamağa qarar aldı.
Cumaaqşamı künü, iyülniñ 6-da, Kreml kontrol etken Bağçasaray mahkemesi qırımtatarlarnıñ evlerinde keçirilgen tintüvlerniñ şaatı Emil Belâlovğa 150 biñ ruble (tahminen 66 biñ grivna – QA) para cezasını berdi. Onı «qanunsız mitingde» tekrar iştirak etmesinde qabaatladılar.
Rusiye Qırımnı işğal etken soñ yarımadada mustaqil jurnalistler, cemaat failleri, qırımtatar sakinleri muntazam surette tintüv ve soravlarğa oğray. Uquq qorçalayıcılar bunı «fikir farqlılığına qarşı küreş» olaraq tanıta.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
