Qırımda bağçasaraylı «Hizb ut-Tahrir davasınıñ» mabüsi Rustem Abiltarovnıñ babası Seyran Abiltarov keçingen. Bunı avgustnıñ 2-nde Qırımtatar Milliy Meclis reisi Refat Çubarov haber etti.
Onıñ yazğanına köre, cenaze avgustnıñ 3-nde Bağçasarayda ötkerilecek.
«Endi biz Qırım işğaliniñ daa bir acınıqlı hususiyetini köremiz – tuvğanlar keçingenlerni soñki yolğa ozğarıp olamay, çünki azatlıqtan qanunsız marum etilgenler – birileri Aqmescitniñ muvaqqat apishanesine alınğan, başqaları qıtaiy Rusiyege yollanılğan. Keçende Aliye hanımnı, siyasiy mabus olğan Qırımtatar Milliy Meclisiniñ reis muavini Ahtem Çiygoznıñ anasını defin etken edik, şimdi – Seyran ağanı, siyasiy mabus Rustem Abiltarovnıñ babasını. Allah-Taalâ Qırımnı «rus dünyasınıñ» tarafdarları ve imayecileri tarafından ketirilgen insansevmezlikten eñ tez vaqıtta temizlemege imkân bersin», – dep yazdı Refat Çubarov.
İyülniñ başında Kremlniñ nezaretindeki Qırım Yuqarı mahkemesi bağçasaraylı «Hizb ut-Tahrir davasınıñ» mabuslarına apiste yatma müddetini sentâbrniñ 12-ne qadar uzatqan edi.
2016 senesi mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
